យុទ្ធសាស្ត្រម៉ាឃីតធីង

យុទ្ធសាស្ត្រម៉ាឃីតធីង ជាយុទ្ធសាស្ត្រស្នូលក្នុងការធ្វើម៉ាឃីតធីងដើម្បីទទួលបានជោគជ័យ ទាំងប្រភេទទំនិញ និងសេវាកម្ម។ នៅក្នុង 4Ps មានធាតុទាំងបួនរួមផ្សំគ្នាដូចជា Product(ផលិតផល) Place(ទីតាំង) Price(តម្លៃ) និង Promotion(ប្រូម៉ូសិន)។ យើងប្រើយុទ្ធសាស្ត្រនេះដើម្បីសិក្សាអំពីចរិកលក្ខណៈមួយចំនួនរបស់អាជីវកម្មដែលវានឹងបង្ហាញអំពី អ្វីដែលអតិថិជនមានតម្រូវការ ទីកន្លែងដែលអតិថិជនអាចទទួលបានទំនិញឬសេវាកម្មរបស់ពួកយើង របៀបដែលយើងអាចធ្វើអោយពិភពលោកស្គាល់ផលិតផលរបស់យើង ដឹងអំពីអ្វីដែលយើងគួរធ្វើប្រសិនបើយើងក្រឡែកទៅមើលដៃគូរប្រកួតប្រជែង និង ដឹងថា តើយើងត្រូវធ្វើអ្វីខ្លះដើម្បីមានទំនាក់ទំនងល្អជាមួយអតិថិជន។

👉Product (ផលិតផល)

ផលិផលដែលដាក់លក់ក្នុងទីផ្សារត្រូវបានគេចែកជាពីរធំៗគឺ ទំនិញ និងសេវាកម្ម។ ផលិតផលដែលយើងដាក់អោយចរាចរនៅលើទីផ្សារត្រូវតែជាផលិតផលដែលមានតម្រូវការ មានន័យថា មានអតិថិជនដែលចង់បានផលិតផលនោះទៅប្រើប្រាស់។ ឬក៏ ផលិតផលនោះ ជាផលិតផលដែលយើងផ្គត់ផ្គង់ ហើយធ្វើអោយអតិថិជនគិតថា ពួកគេមានតម្រូវការ អាចនិយាយបានថា យើងជាអ្នកបង្កើតតម្រូវការ។

👉Price (តម្លៃ)

តម្លៃគឺជាចំនួនទឹកប្រាក់ដែលអតិថិជននឹងចំណាយមកលើផលិតផលរបស់យើង ហើយតម្លៃគឺមានផលប៉ះពាល់ខ្លាំងមកលើអាជីវកម្ម បើយើងកំណត់វាមិនបានត្រឹមត្រូវ។ តម្លៃត្រូវបានកំណត់ដោយផ្អែកទៅលើកត្តាពាក់ព័ន្ធដូចជា គុណតម្លៃរបស់ផលិតផលយើង តម្លៃវត្ថុធាតុដើមក្នុងការផលិត សេវាកម្មដែលយើងផ្តល់ជូន តម្លៃរបស់ដៃគូរប្រកួតប្រជែង តម្លៃតាមរដូវកាលជាដើម។ តម្លៃមានចំណុចច្រើនដែលយើងអាចលេងជាមួយបាន ដូចជាការបញ្ចុះថ្លៃដើម្បីទទួលបានអតិថិជនថ្មីៗ។

👉Place (ទីតាំង)

ទីតាំងគឺជាទីកន្លែងដែលយើងដាក់លក់ទំនិញ ឬជាកន្លែងផ្តល់សេវាទៅកាន់អតិថិជនរបស់យើង។ យើងត្រូវឆ្លើយសំណួរថា តើកន្លែងណាដែលសាកសមសម្រាប់អាជីវកម្មរបស់យើង តើកន្លែងណាដែលអតិថិជនរបស់យើងងាយស្រួលមកទទួលយកគុណតម្លៃដែលយើងផ្តល់ជូន។ តាមការសិក្សាទីផ្សារបានបង្ហាញថា ទីកន្លែងដែលអតិថិជនងាយមើលឃើញ នោះនឹងមានឱកាសនៃការលក់គឺច្រើនជាងគេ។

👉Promotion (ប្រូម៉ូសិន)

ប្រូម៉ូសិន គឺជាយុទ្ធផ្សព្វផ្សាយ ដើម្បីធ្វើយ៉ាងណាទាក់ទាញការចាប់អារម្មណ៍ ដើម្បីទទួលបានការគាំទ្រក្នុងពេលបច្ចុប្បន្ន និងក្នុងពេលអនាគត។ ប្រូម៉ូសិនមានដូចជា ការផ្សាយពាណិជ្ជកម្ម សកម្មភាពសង្គម ការបញ្ចុះតម្លៃ ឬការរៀបជាកម្មវិធីនានាជាដើម។ នាយុគសម័យបច្ចុប្បន្ន ការធ្វើប្រូម៉ូនសិនភាគច្រើន គឺធ្វើនៅតាមប្រព័ន្ធអនឡាញ ជាពិសេស ប្រព័ន្ធបណ្តាញសង្គម។